Mat 2 | NdeIBE | STEP | UJesu esezelwe eBhethilehema laseJudiya ngesikhathi sokubusa kweNkosi uHerodi kwafika eJerusalema iZazi zivela empumalanga,

Matthew 2

Ukufika KweZazi

1 UJesu esezelwe eBhethilehema laseJudiya ngesikhathi sokubusa kweNkosi uHerodi kwafika eJerusalema iZazi zivela empumalanga,

2 zabuza zathi, “Ungaphi lowo ozalelwe ukuba yinkosi yamaJuda na? Sayibona inkanyezi yakhe empumalanga ngakho size ukuzamkhonza.”

3 Kwathi iNkosi uHerodi isikuzwile lokhu yakhathazeka kanye leJerusalema lonke njengaye.

4 Kwathi esebizele ndawonye bonke abaphristi abakhulu lezazi zomthetho, wababuza ukuthi uKhristu wayezazalelwa ngaphi.

5 Baphendula bathi, “EBhethilehema laseJudiya, ngokuba yilokhu okwalotshwa ngumphrofethi ukuthi:

6 “ ‘Lawe Bhethilehema, elizweni lakoJuda, kawumncinyane kulabo bonke ababusi bakoJuda; ngokuba kuzavela umbusi kuwe ozakuba ngumalusi wabantu bami u-Israyeli.’ ”

7 UHerodi wasezibiza iZazi ngasese wadingisisa kuzo isikhathi ngqa inkanyezi eyaphuma ngaso.

8 Wabedlulisela eBhethilehema wathi, “Hambani liyomdingisisa umntwana. Lingamfumana lingazise masinyane ukuze lami ngihambe ngiyomkhonza.”

9 Sezizwile okwatshiwo yinkosi, zasuka zahamba, kwathi inkanyezi leyo ezaziyibonile empumalanga yahamba phambili yaze yayakuma lapho umntwana ayekhona. 10 Zathi ngokuyibona inkanyezi zacicima ngokuthokoza.

11 Zangena endlini zambona umntwana lonina uMariya, zakhothama zamkhonza. Zasezivula izimpahla zazo eziligugu zamkhunga ngezipho zegolide lempepha lemure.

12 Kwathi ngoba zixwayisiwe ephutsheni ukuthi zingabuyeli kuHerodi, zaqonda elizweni lakibo ngenye indlela.

Ukubalekela EGibhithe

13 Kwathi sezihambile ingilosi yeNkosi yabonakala kuJosefa ngephupho. Yathi, “Vuka uthathe umntwana lonina libalekele eGibhithe. Lihlale khonale ngize ngilitshele, ngoba uHerodi uzamdinga umntwana efuna ukumbulala.”

14 Ngakho wavuka wathatha umntwana lonina kusebusuku waya eGibhithe 15 lapho abahlala khona uHerodi waze wafa. Ngakho kwagcwaliseka lokho iNkosi eyayikutshilo ngomphrofethi ukuthi, “INdodana yami ngayibiza ukuthi iphume eGibhithe.”

16 Kwathi ukuba uHerodi ananzelele ukuthi iZazi zazimphicile wazonda wafa, wasekhupha umlayo ukuthi kubulawe bonke abafanyana eBhethilehema lasemmangweni wonke oseduze, bonke ababeleminyaka emibili langaphansi, kuhambelana lesikhathi leso ayesitshelwe yiZazi. 17 Ngakho lokho okwakutshiwo ngumphrofethi uJeremiya kwagcwaliseka ukuthi:

18 “Ilizwi lezwakala eRama, ukukhala lesililo esikhulu, uRasheli ekhalela abantwabakhe esala ukududuzwa, ngokuba bengasekho!”

Ukubuyela ENazaretha

19 UHerodi esefile ingilosi yeNkosi yabonakala ngephupho kuJosefa eseGibhithe

20 yathi, “Sukuma, thatha umntwana lonina liye elizweni lako-Israyeli, ngokuba labo ababefuna impilo yomntwana sebefile.”

21 Yikho wasukuma wathatha umntwana lonina waya elizweni lako-Israyeli. 22 Kodwa wathi ngokuzwa ukuthi u-Akhelawu wayebusa eJudiya esikhundleni sikayise uHerodi wesaba ukuya khona. Kwathi esexwayisiwe ephutsheni wahamba wayahlala eGalile, 23 wayahlala emuzini owawuthiwa yiNazaretha. Ngalokho kwagcwaliseka okwatshiwo ngabaphrofethi ukuthi: “Uzabizwa ngokuthi umNazarini.”